Namanganda bog‘chaning 5 yoshli tarbiyalanuvchisi ombor mudiri tomonidan jinsiy zo‘ravonlikka uchradi
Namangan viloyatining Uchqo‘rg‘on tumanidagi bog‘chalardan birida 5 yoshli bolaga nisbatan jinsiy zo‘ravonlik sodir etilgani yuzasidan jinoyat ishi qo‘zg‘atildi. Bu haqda Bolalar ombudsmani Portal24.uz’ga ma’lum qildi.
Ijtimoiy tarmoqlarda Namangan viloyatidagi maktabgacha ta’lim tashkilotlaridan birida 5 yoshli tarbiyalanuvchiga nisbatan jinsiy zo‘ravonlik sodir etilgani haqida xabarlar tarqaldi. Ma’lumotlarga ko‘ra, zo‘ravonlikda bog‘chaning ta’lim jarayoni bilan bog‘liq bo‘lmagan xodimi — ombor mudiri gumonlanmoqda.
Xabar kelib tushgach, tuman “Inson” ijtimoiy xizmatlar markazi xodimlari bolaning yashash xonadoniga zudlik bilan yetib borib, vaziyatni birlamchi baholashdan o‘tkazgan. Baholash natijasida bola yuqori xavf darajasida ekani aniqlangan.
Shundan so‘ng markaz xodimlari ichki ishlar organlari va tibbiyot muassasalari bilan hamkorlikda bolaning hayoti va sog‘lig‘iga tahdid solishi mumkin bo‘lgan omillarni bartaraf etish bo‘yicha zarur choralarni ko‘rgan.
Mazkur holat yuzasidan 12-sentabr kuni tuman IIB tergov bo‘linmasi tomonidan Jinoyat kodeksining 118-moddasi 4-qismi bilan jinoyat ishi qo‘zg‘atilgan. Shu kunning o‘zida gumonlanuvchi K.M. protsessual tartibda ushlanib, unga nisbatan qamoqqa olish ehtiyot chorasi qo‘llanilgan.
Ijtimoiy himoya milliy agentligi hozirda bola va uning onasi psixologik, tibbiy hamda huquqiy yordam bilan qamrab olinganini bildirdi. Shuningdek, ular uchun zarur ijtimoiy xizmatlar tashkil etilgan. Ayni vaqtda bola o‘z oilasi bag‘rida, ota-onasining qaramog‘ida.
Jinoyat ishi bo‘yicha dastlabki tergov harakatlari davom etmoqda. Bolalar ombudsmani jabrlanuvchi bolaning qonuniy manfaatlari ta’minlanishi yuzasidan ishni o‘z vakolatlari doirasida kuzatib bormoqda.
