Sergelidagi oilaviy poliklinikada elektr o‘chdi. Hokimlik va elektr tarmoqlari ikki xil izoh berdi
Ijtimoiy tarmoqlarda Toshkent shahrining Sergeli tumanidagi 71-son oilaviy poliklinikasi filialida elektr energiyasi yo‘qligi sabab elektron navbat tizimi hamda ultratovush tekshiruvi (UTT) xizmati ishlamayotgani haqida murojaat tarqaldi.
Shundan so‘ng Sergeli tumani hokimligi holat yuzasidan rasmiy munosabat bildirib, elektr ta’minotidagi uzilish hududni elektr energiyasi bilan ta’minlovchi transformator punktida yuzaga kelgan texnik nosozlik oqibatida sodir bo‘lganini ma’lum qildi.
Hokimlik ma’lumotiga ko‘ra, mutaxassislar tomonidan nosozlik qisqa muddatda bartaraf etilgan va poliklinikaning elektr ta’minoti qayta tiklangan. Ayni paytda muassasa odatdagi tartibda faoliyat yuritayotgani, elektron navbat tizimi, UTT apparatlari hamda boshqa tibbiy uskunalar to‘liq ishlayotgani qayd etildi.
Oradan ko‘p o‘tmay, "Toshkent shahar elektr tarmoqlari" MCHJ ham mazkur holat yuzasidan alohida rasmiy munosabat e’lon qildi.
Korxona ma’lumotiga ko‘ra, 71-son oilaviy poliklinikasi filialining elektr energiyasi bo‘yicha 15 891 624,56 so‘m miqdorida muddati o‘tgan qarzdorligi mavjud. Qayd etildiki, amaldagi qonunchilik hamda elektr energiyasidan foydalanish qoidalariga muvofiq, qarzdorlik belgilangan muddatda bartaraf etilmagani sabab iste’molchi ASKUE (Avtomatlashtirilgan elektr energiyasini hisobga olish va nazorat qilish) tizimi orqali elektr tarmog‘idan avtomatik ravishda uzilgan.
"Toshkent shahar elektr tarmoqlari" MCHJning bildirdiki, hozirga qadar mazkur qarzdorlik qoplanmagan. Shu sababli elektr ta’minotini qayta tiklash uchun huquqiy asos mavjud emas. Qarzdorlik to‘liq bartaraf etilgach, elektr ta’minoti amaldagi tartib va texnik reglamentlarga muvofiq belgilangan tartibda qayta tiklanadi.
