Saudiya shahzodasi Londondagi mehmonxonada vafot etgani ma’lum bo‘ldi
Buyuk Britaniyaning London shahridagi hashamatli mehmonxonada Saudiya Arabistoni qirollik oilasi a'zosi 29 yoshli shahzoda Abdulloh bin Fahd bin Abdulloh bin Abdulaziz bin Jalaviy Ol Saudning vafot etgani yuzasidan tergov tafsilotlari ochiqlandi. Bu haqda mahalliy The London Standart yozmoqda.
Koroner sudida ma'lum qilindiki, shahzoda 2025-yil 19-noyabr kuni G‘arbiy Londondagi Kensington tumanida joylashgan London Marriott Hotel Kensington mehmonxonasiga bir haftalik muddatga joylashgan. U 25-noyabr kuni mehmonxona xonasidagi hammomda hushsiz holatda topilgan.
Tozalovchi xodim beshinchi qavatdagi qulflangan xonaga kirganida, shahzoda kiyimlari bilan hammom polida yotganini ko‘rgan. Mehmonxona xavfsizlik xizmati va tez yordam chaqirilgan, biroq shifokorlar uning hayotini saqlab qola olmagan.
Sudda e'lon qilingan toksikologik ekspertiza xulosasiga ko‘ra, marhumning qonida 100 ml qonga 222 milligramm spirt aniqlangan. Bu Buyuk Britaniyada avtomobil boshqarish uchun belgilangan me'yordan deyarli uch baravar yuqori bo‘lib, mutaxassislar bunday miqdor koma holatini keltirib chiqarishi mumkinligini bildirgan.
Shuningdek, uning organizmida hayot uchun xavfli darajadagi GHB (gamma-gidroksibutirat) moddasi, nasha izlari, dam beruvchi alprazolam (Xanax) preparati hamda boshqa bezovtalikka qarshi dori vositalari aniqlangan.
Sud materiallariga ko‘ra, shahzoda alkogol va Xanax preparatini iste'mol qilish bilan bog‘liq muammolarga duch kelgan.
Ma'lum bo‘ldiki, u 2025-yil avgust oyida London janubi-g‘arbidagi mashhur Priory Clinic reabilitatsiya markazida davolangan. U yerda alkogol, benzodiazepinlar va pregabalin preparatidan voz kechish bo‘yicha detoks davolash kursini o‘tagan.
Shahzodani davolagan psixiatr doktor Viktoriya Chamorroning suddagi ko‘rsatmasiga ko‘ra, bemor davolanish jarayonida shifokorlar bilan yaxshi hamkorlik qilgan va detoks jarayoni jismoniy asoratlarsiz o‘tgan.
Koroner sudi shahzodaning o‘limi yuzasidan surishtiruvni davom ettirmoqda.
