Saudiya Arabistoni 365 kunlik ko‘p martalik Umra vizasini joriy etdi
Saudiya Arabistoni Haj va Umra vazirligi berilgan kundan boshlab 365 kun davomida amal qiluvchi ko‘p martalik Umra vizasini joriy qildi. Bu haqda “Saudi Press Agency” xabar berdi.
Yangi viza egalariga mamlakatga bir necha bor kirish va u yerda umumiy hisobda 90 kungacha bo‘lish imkoniyati beriladi. Qaror “Saudi Vision 2030” hamda Ziyoratchilar tajribasini yaxshilash dasturlari doirasida qabul qilingan.
Ziyoratchilar uchun belgilangan asosiy talab va shartlarga ko‘ra, har bir tashrif chog‘ida Nusuk platformasidagi tasdiqlangan provayderlardan xizmatlar paketini xarid qilish lozim. Paket davomiyligi vizadagi qolgan kunlar muddatidan oshmasligi kerak. Mamlakatga yetib borishdan oldin Nusuk ilovasi orqali Umra ruxsatnomasi rasmiylashtirilgan bo‘lishi shart.
Mamlakatdan chiqib ketilganda viza vaqtincha to‘xtatiladi va navbatdagi tashrifda talablar bajarilgach qayta faollashadi. Ushbu viza bilan Haj mavsumida mamlakatga kirib bo‘lmaydi.
