Sanoatdagi radioaktiv va xavfli chiqindilar ilk bor qat’iy tartibga solinmoqda
Chiqindilarni boshqarish va sirkulyar iqtisodiyotni rivojlantirish agentligi xabariga ko‘ra, Prezidentning yangi qarori bilan ilgari tizimlashtirilmagan sohada tub islohotlar boshlandi. Endilikda tog‘-kon, metallurgiya, kimyo, neft-gaz va energetika korxonalarida hosil bo‘ladigan I–IV xavflilik sinfidagi va radioaktiv chiqindilarning 20 foizini qayta ishlash majburiyati belgilandi.
2027-yil 1-yanvardan xavfli chiqindi chiqaruvchi korxonalar har yili maxsus reja tasdiqlaydi. Chiqindilarni faqat ixtisoslashgan tashkilotlarga topshirish shart bo‘ladi, ijroni esa Ekopolitsiya nazorat qiladi. 2026-yil 1-oktabrdan boshlab tegishli statistika choraklik tartibda agentlik axborot tizimiga kiritib boriladi.
Shuningdek, Chiqindilarni boshqarish agentligi huzurida Xavfli chiqindilarni boshqarish direksiyasi tuzilgan. Respublika radioaktiv chiqindilarni saqlash markazi hamda foydalanishdan chiqarilgan xavfli maydonlar ushbu agentlik tasarrufiga o‘tkazilgan. Sobiq uran konlari joylashgan yerlar soliqdan ozod etiladi.
2027-yilgacha raqamli axborot tizimi ishga tushirilib, xavfli chiqindilarning elektron pasporti shakllantiriladi. Bu orqali I–III sinfga kiruvchi chiqindilarning hosil bo‘lishidan to utilizatsiyasigacha bo‘lgan barcha bosqichlari onlayn kuzatib boriladi.
Ma’lumot uchun, xavfli chiqindilar sirasiga tog‘-kon, kimyo va neft-gaz sanoati qoldiqlari, uran konlaridan chiquvchi radioaktiv materiallar, zaharli pestitsidlar hamda tibbiy va farmatsevtika chiqindilari kiradi. Shuningdek, kundalik hayotda ishlatiladigan akkumulyatorlar, batareyalar, simobli termometrlar, energiya tejovchi lampalar, ishlatilgan motor moylari va eskirgan elektronika platalari ham shular jumlasidandir.
