Samarqandda bankka bostirib kirib, pul talab qilgan niqobli shaxs ushlandi
Joriy yilning 13-iyul kuni soat 17:00 atrofida Samarqand shahri Mirzo Ulug‘bek ko‘chasida joylashgan bank filiallaridan birida favqulodda vaziyat yuzaga keldi. Qo‘riqlash xizmati xodimlari voqea joyiga yetib borganida qishki kiyim kiygan, yuziga niqob taqqan va qora sumka ko‘targan shaxs bank oynalarini sindirib, o‘zida portlovchi modda borligini aytgan holda pul talab qilayotganini aniqlagan.
Hodisa joyiga ichki ishlar organlari va tez tibbiy yordam xodimlari jalb etilib, gumonlanuvchi bilan olib borilgan muzokaralar natijasida u o‘z ixtiyori bilan taslim bo‘lgan va qo‘lga olingan. Baxtsiz hodisa oqibatida bank xodimlari hamda mijozlardan hech kim jabrlanmagan.
Dastlabki surishtiruvga ko‘ra, ushbu shaxs pulni oson yo‘l bilan qo‘lga kiritishni maqsad qilgan. Holat yuzasidan Jinoyat kodeksining 164-moddasi 4-qismi (bosqinchilik) bilan jinoyat ishi qo‘zg‘atildi.
