Samarqandda 9 ming AQSH dollaridan ziyod pora olgan prokuror o‘rinbosari qo'lga olindi
Samarqand viloyati Urgut tumani prokuror o‘rinbosari Pastdarg‘om tumani prokuroturasida xizmat qilgan davrida mahalliy mas’uliyati cheklangan jamiyat tomonidan gazdan noqonuniy foydalanilgani holati bo‘yicha hisoblangan 2 milliard 887 million so‘mlik zararni 805,9 million so‘mga kamaytirib berishni va’da qilgan. Buning evaziga vositachilar orqali 6,5 ming AQSH dollari va 35 million so‘m miqdorida pora olgan.
Bundan tashqari, prokuror o‘rinbosari MCHJ mansabdorlariga nisbatan Jinoyat kodeksining 169-moddasi (O‘g‘rilik) bilan qo‘zg‘atilgan jinoyat ishi doirasida zarar miqdorini yana 150–200 million so‘mga kamaytirishni va’da qilgan. Shuningdek, sud tizimidagi tanishlari orqali yengil jazo tayinlatib berish evaziga MCHJ rahbaridan qo‘shimcha 15 ming AQSH dollari talab qilgan.
Tezkor tadbir davomida prokurorning noqonuniy harakatlariga daxldor ashyoviy dalillar protsessual tartibda hujjatlashtirib olingan. Hozirda jinoyat ishi qo‘zg‘atilib, gumonlanuvchiga nisbatan “qamoq” ehtiyot chorasi qo‘llanilgan. Dastlabki tergov harakatlari davom ettirilmoqda.
