Rossiyalik reper Qozog‘istonda narkotik bilan qo‘lga olindi
Rossiyalik reper Navai Qirg‘izistondan Qozog‘istonga o‘tayotganda, “Qordoy” chegara punktida hibsga olindi. Reperning mashinasidan narkotik modda topilgan va unga nisbatan jinoyat ishi qo‘zg‘atilgan.
Qozog‘iston IIV xabar berishicha, qo‘shiqchining avtotransport vositasini tekshirish jarayonida taqiqlangan moddalar topilib, musodara qilingan. Holat yuzasidan huquqni muhofaza qilish organlari giyohvand vositalarni kontrabanda qilishga urinish moddasi bilan jinoyat ishi qo‘zg‘atgan. Ushbu modda bo‘yicha qo‘shiqchiga 8 yilgacha ozodlik mahrum qilish jazosi berilishi mumkin.
Ayni paytda Navai vaqtincha ushlab turish izolyatoriga joylashtirilgan.
Avtomashinada taqiqlangan moddalar borligini Atlas laqabli xizmat iti payqagan. Uning munosabatidan so‘ng, chegarachilar transport vositasini tekshirgan va haydovchi o‘rindig‘i cho‘ntagidan 2,5 gramm marixuana, shuningdek maydalagich va o‘rama sigaret uchun qog‘oz topgan. Bundan tashqari, qo‘shiqchining menejeri qo‘l sumkasida taxminan 10 gramm giyohvandlik moddasi borligi aniqlangan.
Ma’lumotlarga ko‘ra, tergov chog‘ida Navai narkotikni Bishkekda bo‘lgan vaqtida sotib olganini aytgan.
O‘zbekistonga tashrif va bekor qilingan konsert
Navai Qozog‘iston chegarasida qo‘lga olinishidan sal oldin, 8-oktabr kuni Toshkentda yakkaxon konsert bergandi. Rossiyalik reper, shuningdek Toshkent ko‘chalari bo‘ylab Damas avtomobilida yurib, tomosha uyushtirgan.
Qozog‘istonga ham konsert berishga borayotgan reper chegarada narkotik bilan qo‘lga olingach, uning Ostondagi konserti qoldirildi. Tashkilotchilar buni “texnik sabablar” bilan izohlagan.
