Rossiyada qiynalgan migrantlar uchun vatanga bepul qaytishi uchun 24/7 aloqa raqamlari e’lon qilindi
Agentlik matbuot xizmati ma’lum qiladiki, Rossiya hududida mehnat faoliyatini olib borish davomida og‘ir moliyaviy ahvolga tushib qolgan va vatanga qaytish imkoniyatini yo‘qotgan fuqarolar uchun doimiy ko‘mak tizimi yo‘lga qo‘yilgan. Murojaatchilarning har bir holati alohida ko‘rib chiqilib, zarur amaliy hamda huquqiy yordam ko‘rsatiladi.
Eng muhimi, belgilangan tartib va mezonlarga mos keladigan fuqarolarning O‘zbekistonga qaytishi uchun ketadigan transport xarajatlari agentlik tomonidan to‘liq qoplab beriladi. Fuqarolarga qulaylik yaratish maqsadida Moskvadagi vakolatxona, Koll-markaz va hududiy vakillar tun-u kun – 24/7 rejimida faoliyat yuritmoqda.
Ko‘makka muhtoj O‘zbekiston fuqarolari Moskvadagi markaziy Koll-markaz (+7 499 230-00-32, +7 499 230-00-76), ishonch telefoni (+7 925 045-47-44), shuningdek Sankt-Peterburg, Yekaterinburg, Samara, Novosibirsk, Krasnodar va Vladivostokdagi hududiy vakillarning doimiy aloqa raqamlariga murojaat qilishlari mumkin.
Avvalroq Rossiyaga ish izlab borayotgan markaziy osiyoliklar kamayishda davom eetayotgani xabar qilingan edi.
