Rossiyada patent to‘lovini bir kun kechiktirgan migrantlarning hujjati avtomatik bekor qilinadi
Rossiya Ichki ishlar vazirligi ma’lumotlariga ko‘ra, patent asosida faoliyat yurituvchi xorijliklar har oy jismoniy shaxslardan olinadigan daromad solig‘i bo‘yicha bo‘nak (avans) to‘lovini kechiktirmasdan to‘lab borishi shart. Agar ushbu to‘lov belgilangan muddatda amalga oshirilmasa, patentning amal qilish muddati hech qanday ogohlantirishsiz, avtomatik ravishda to‘xtatiladi.
To‘lov boshqa shaxs tomonidan amalga oshirilgan taqdirda, kvitansiyada migrantning FISHT, tug‘ilgan sanasi va INN raqami aniq ko‘rsatilishi shart, aks holda tizim to‘lovni hisobga olmasligi mumkin. Agar qandaydir xatolik sabab hujjat nohaq bekor qilindi deb hisoblansa, fuqaro hududiy IIB organiga to‘lov kvitansiyalarining asl nusxasi bilan shaxsan murojaat qilishi lozim bo‘ladi.
Shu bilan birga, 2026-yilning 1-oktyabridan e’tiboran soliq idoralari migrantlarning daromadlari haqidagi barcha ma’lumotlarni IIV bazasiga to‘g‘ridan-to‘g‘ri uzatishni boshlaydi. 2027-yil 1-yanvardan esa tartiblar yanada murakkablashadi: xorijlik ishchilar o‘zi va qaramog‘idagi oilasini boqishga yetarli daromadi borligini rasman isbotlashi kerak bo‘ladi. Aks holda, ularga patent uzaytirib berilmaydi, vaqtincha hamda doimiy yashash ruxsatnomalari (RVP va VNJ) bekor qilinadi.
