Rossiyada migrantlar uchun telefon sotib olish va joylashuvni nazorat qiluvchi ilova majburiy etiladi
Rossiya ichki ishlar vaziri oʻrinbosari Igor Zubov ma’lum qiladiki, mamlakatga keladigan har bir migrant roʻyxatdan oʻtish vaqtida telefon sotib olishi shart qilib belgilanadi. Ushbu telefonga xorijlik fuqaroning elektron profili joylashtirilib, u orqali migrantning qayerda ekani nazorat qilinadi. Tizim muhojirlarning bir aholi punktidan boshqasiga ruxsatsiz koʻchishi yoki yashash joyini oʻzgartirishining oldini oladi. Shuningdek, ushbu mobil qurilma orqali migrantlar hujjatlarining muddati tugayotgani yoki tegishli idoralarga borish zarurligi haqida ogohlantirib boriladi.
2025-yil 1-sentyabrdan boshlab Moskva viloyatida muhojirlarning geolokatsiyasini kuzatuvchi “Amina” mobil ilovasi sinovdan oʻtkazila boshlangan edi. Rossiyaga vizasiz kelgan voyaga yetgan barcha muhojirlar uchun undan foydalanish majburiy hisoblanadi.
Ichki ishlar vazirligi ma’lumotlariga koʻra, dekabr oyi oʻrtalariga kelib 139 mingdan ortiq kishi aynan shu ilovada geolokatsiya ma’lumotlari boʻlmagani sababli migratsiya roʻyxatidan chiqarilgan. Amaldagi qoidaga koʻra, agar migrantning qayerda ekani haqidagi ma’lumot tizimga uch ish kunidan koʻproq vaqt davomida kelib tushmasa, u roʻyxatdan oʻchiriladi.
Avvalroq O‘zbekiston migrantlari Rossiyadan uzoqlashib, o‘zlariga muqobil variantlar topayotgani raqamlarda ham aks eta boshlagani aytilgandi.
