Rossiyada migrantlar uchun daromad solig‘ini 30 foizga oshirish va depozitsiz kiritmaslik taklif qilindi
Davlat dumasi deputati va LDPR fraksiyasi vakili Andrey Lugovoy xorijlik ishchilar Rossiyaning ijtimoiy infratuzilmasi hamda tibbiy xizmatlaridan foydalanayotgani sababli ularga soliq yukini oshirish lozimligini ta’kidladi. Uning fikricha, belgilangan soliqlarni to‘lashdan bo‘yin tovlagan mehnat migrantlari darhol mamlakat hududidan chiqarib yuborilishi kerak.
Partiya vakili ilgari surgan yana bir tashabbusga ko‘ra, Rossiyaga kelmoqchi bo‘lgan har bir migrant yoki uning ish beruvchisi maxsus hisobraqamga oldindan pul o‘tkazib qo‘yishi shart bo‘ladi. Ushbu mablag‘lar kelgusida yuzaga kelishi mumkin bo‘lgan deportatsiya, sud xarajatlari va jarimalarni qoplash uchun zaxira sifatida ushlab turilishi ko‘zda tutilgan.
Bundan tashqari, migratsiya sohasida xorijliklarning yashash manzili, ish joyi, soliq to‘lovlari hamda qonunlarga rioya etishini real vaqt rejimida kuzatib boruvchi yagona nazorat tizimini yo‘lga qo‘yish taklif qilindi. Hozircha ushbu tashabbuslar qonun darajasida qabul qilinmagan bo‘lib, partiya tomonidan bildirilgan takliflar bosqichida turibdi.
