Rossiyada endi sudlangan xorijliklarga fuqarolik va yashash guvohnomasi berilmaydi
Rossiya Davlat dumasida qabul qilingan yangi qonunga ko‘ra, Rossiya va boshqa mamlakatlarda jinoyat sodir etib, sudlangan xorijliklar hamda fuqaroligi bo‘lmagan shaxslarga Rossiya fuqaroligi, vaqtincha (jumladan, o‘qish uchun) va doimiy yashash guvohnomalari (VNJ va RVP) berilmaydi. Jinoyatning og‘irlik darajasidan qat’iy nazar, sudlanganlik holati mavjud bo‘lsa, ilgari berilgan hujjatlar ham bekor qilinadi.
Yangi tartibga ko‘ra, 14 yoshdan oshgan xorijliklar vaqtincha yoki doimiy yashash ruxsatnomasini olish uchun Rossiya IIV organlariga murojaat qilganda o‘z mamlakatining vakolatli idoralari tomonidan kamida 3 oy oldin berilgan sudlanmagani haqidagi ma’lumotnomani taqdim etishi shart.
Ushbu ma’lumotnomani topshirishdan quyidagilar ozod etiladi:
• 14 yoshga to‘lmagan shaxslar;
• Qochoq deb tan olingan yoki siyosiy/vaqtincha boshpana olganlar;
• Rossiya Qurolli Kuchlarida shartnoma bo‘yicha xizmat qilayotgan yoki harbiy harakatlarda qatnashayotganlar;
• Ilgari ushbu hujjatlarni olishda shunday ma’lumotnomani topshirgan vaqtincha yoki doimiy yashash ruxsatnomasiga ega shaxslar.
Avvlaroq Rossiyada migrantlar uchun telefon sotib olish va joylashuvni nazorat qiluvchi ilova majburiy etilishi xabar qilingan edi.
