Rossiya O‘zbekiston va bir qator davlatlarga 1 mln rubldan ortiq naqd pul olib chiqishni taqiqladi
29-sentabr kuni Rossiya prezidenti Vladimir Putin imzolagan farmonga ko‘ra, jismoniy shaxslarga Rossiyadan O‘zbekiston, Yevrosiyo iqtisodiy ittifoqi mamlakatlari, Ozarbayjon va Tojikistonga 1 million rubldan ortiq naqd rubl olib chiqish taqiqlandi. Ammo yuridik shaxslar va yakka tartibdagi tadbirkorlar uchun esa summadan qat’i nazar to‘liq taqiq joriy etilgan.
Farmonga ko‘ra, ayrim istisnolar mavjud. Hukumat belgilagan xalqaro aeroportlar orqali naqd pul olib chiqish mumkin. Buning uchun pullar shaxsning o‘z hisobidan yechib olinganligini tasdiqlovchi bank ko‘chirmalari taqdim etilishi shart. Shuningdek, cheklov diplomatik ehtiyojlar va yuridik shaxslar tomonidan amalga oshiriladigan xalqaro tranzit tashuvlarga tatbiq etilmaydi.
Avvalroq bunday cheklovlar asosan Yevrosiyo iqtisodiy ittifoqi mamlakatlariga nisbatan amal qilgan. Yangi farmon bilan limit sezilarli darajada pasaytirilib, O‘zbekiston, Ozarbayjon va Tojikiston ham ro‘yxatga kiritildi.
