Rossiya Daniya harbiy vertolyotini o‘qqa tutdi
Daniya Qurolli kuchlari ma’lumotiga ko‘ra, Fennec rusumidagi harbiy vertolyot Gedser shahri yaqinidagi xalqaro suvlarda Rossiya fregatini odatiy kuzatish hamda suratga olish topshirig‘ini bajarayotgan bo‘lgan. Shu payt Rossiya kemasi vertolyot tomonga ikki dona signal raketasini uchirgan va ulardan biri harbiy havo kemasi yaqinidan o‘tgan. Daniya Mudofaa vazirligi Rossiya harbiylari tomonidan aloqa o‘rnatishga hech qanday urinish bo‘lmaganini ta’kidlamoqda.
Sodir bo‘lgan hodisaga munosabat bildirgan Daniya Bosh vaziri Mette Frederiksen Rossiya tomonining harakatini ehtiyotsiz deb baholab, bu mamlakatni qo‘rqitishga qaratilgan harakat ekanini bildirdi. Tashqi ishlar vaziri Lars Lokke Rasmussen esa Rossiya harbiy amaliyotlarda maqbul xatti-harakatlar chegarasini atayin buzayotganini ta’kidladi. Yevrokomissiya prezidenti Ursula fon der Lyayen ham ushbu voqeani Rossiyaning Yevropaga nisbatan umumiy provokatsion siyosatining bir qismi deb atadi.
O‘z navbatida, Rossiyaning Daniyadagi elchisi Vladimir Barbin Daniya vertolyotining xatti-harakatlarini provokatsiya deb atab, harbiy havo kemasi kema yaqinida xavfli manevrlar bajarganini da’vo qildi. Rossiya diplomatik korpusi voqea tafsilotlari atroflicha o‘rganilishini ma’lum qildi.
Mazkur kelishmovchilik NATO kuchlari Litva osmonida Belarus tomondan kirib kelgan noma’lum dronni urib tushirgan hamda Polsha havo hududida mudofaa choralarini kuchaytirgan vaqtga to‘g‘ri keldi.
