Qurilishdan voleybolgacha. Davlat xaridlaridagi 9,3 milliard so‘mlik o‘yinlar fosh bo‘ldi
Korrupsiyaga qarshi kurashish agentligi tomonidan o‘tkazilgan o‘rganishlarda davlat xaridlari chog‘ida ishtirokchilar o‘rtasida raqobatni cheklash va baholash mezonlarini buzish holatlari qayd etildi.
Eng yirik qonunbuzilishlar “Binolardan foydalanish va qurilish-ta’mirlash ishlari direksiyasi” (1,74 mlrd so‘m), “Bekobod ovqatlanish kombinati” (1,6 mlrd so‘m), Uchqo‘rg‘on tuman tibbiyot birlashmasi (1,55 mlrd so‘m) hamda shu tumandagi voleybolga ixtisoslashtirilgan maktab-internati (1,43 mlrd so‘m) buyurtmachiligida sodir etilgan.
Shuningdek, Urganch va Surxondaryodagi tibbiyot muassasalari, Piskent tumani hokimligi, Navoiy shahar obodonlashtirish boshqarmasi va Yangibozor tuman ta’lim bo‘limidagi yuzlab million so‘mlik xaridlarda ham qoidabuzarliklarga yo‘l qo‘yilgani ma’lum bo‘ldi.
Agentlik kiritgan taqdimnomalar natijasida xarid komissiyalarining g‘oliblarni aniqlash bo‘yicha bayonnomalari bekor qilindi. To‘plangan materiallar aybdorlarga nisbatan qonuniy chora ko‘rish uchun huquqni muhofaza qiluvchi idoralarga yuborildi.
