Qozoq tengesi Yevropa va Osiyoning eng kuchli valyutasiga aylandi
“Financial Times” nashrining xabar berishicha, 2026-yilda tenge AQSH dollariga nisbatan 9,7 foizga qimmatlab, faqat Afrikaning ayrim valyutalaridangina ortda qolgan. Markaziy Osiyoning eng yirik iqtisodiyotida yuqori foiz stavkalarining saqlanib qolayotgani hamda aprel oyida ichki obligatsiyalarning Euroclear xalqaro tizimiga ulanishi xorijiy kapital oqimini keskin jadallashtirdi. Iyun oyidagi ko‘rsatkichlarga ko‘ra, xorijliklar egalik qilayotgan tenge obligatsiyalari hajmi 5 milliard dollarga yetib, umumiy bozorning o‘ndan bir qismini egalladi.
Investorlar Qozog‘istonni sanksiyalar sabab xalqaro bozorlardan uzib qo‘yilgan Rossiyaning munosib muqobili sifatida ko‘rmoqda. Shuningdek, mamlakatga kirib kelayotgan to‘g‘ridan-to‘g‘ri xorijiy investitsiyalar hajmi ham ortib bormoqda – birinchi chorakning o‘zida bu ko‘rsatkich 6,3 milliard dollarni tashkil etdi. Yana bir muhim omil shundaki, avgust oyida Qozog‘iston Nvidia va Firebird kompaniyalari bilan ma’lumotlarni qayta ishlash markazlarini barpo etish bo‘yicha 10 milliard dollarlik yirik bitim imzoladi.
Siyosiy va geografik tomondan Qozog‘iston Pekin hamda Moskvaga to‘liq qaram bo‘lib qolmaslik uchun mustaqil iqtisodiy siyosat yuritishga urinmoqda. Xitoydan Yevropaga yuk tashuvchi asosiy tranzit markaziga aylanish hamda AQSH hamda Xitoy o‘rtasidagi texnologik raqobatdan unumli foydalanish evaziga mamlakat neftdan tashqari sohalarda ham Barqaror iqtisodiy o‘sishni ta’minlamoqda.
