Qozog‘istonga kirishda pullik elektron ruxsatnoma talab qilinadi
Qozog‘iston vizasiz rejim asosida mamlakatga kiruvchi xorijiy fuqarolar uchun Electronic Travel Authorization (ETA) – elektron kirish ruxsatnomasi tizimini bosqichma-bosqich joriy etmoqda. Yangi tartib O‘zbekiston fuqarolariga ham taalluqli bo‘ladi. Qozog‘istonning rasmiy manbalarida ETA vizasiz kirish huquqiga ega davlatlar fuqarolari uchun mo‘ljallangani va ruxsatnoma QazETA raqamli platformasi orqali rasmiylashtirilishi qayd etilgan.
Qozog‘istonning QazETA platformasiga ko‘ra, xorijliklar safardan kamida 72 soat oldin ETA uchun ariza topshirishi kerak. Ruxsatnoma 180 kun amal qiladi. Biroq ETA mamlakatga kirishni avtomatik ravishda kafolatlamaydi — yakuniy qaror chegaradagi nazorat vaqtida qabul qilinadi.
Yangi tizim 25-avgustdan 1-noyabrgacha sinov rejimida ishlaydi. Shu davrda xorijliklar ETA olmagan bo‘lsa ham Qozog‘istonga kiritiladi. Keyingi bosqichda esa elektron ruxsatnoma majburiy tus oladi.
1-noyabrdan ETA Qozog‘istonga samolyot orqali keladigan xorijliklar uchun majburiy bo‘lishi kutilmoqda. 15-noyabrdan esa talab avtomobil yoki avtobusda Qozog‘istonning O‘zbekiston, Xitoy va Turkmaniston bilan chegaralaridan kiruvchilarga ham tatbiq etilishi rejalashtirilgan. Keyingi bosqichlarda Rossiya va Qirg‘iziston bilan avtomobil chegaralari, shuningdek, temir yo‘l va dengiz orqali kirish punktlari ham tizimga qo‘shiladi.
Bu tartib O‘zbekistondan Qozog‘istonga avtomobil yoki avtobusda boradigan fuqarolarga ham bevosita taalluqli bo‘lishi mumkin. Masalan, Toshkentdan Chimkent yoki Olmaotaga yo‘l oladigan yo‘lovchilar safardan oldin ETA rasmiylashtirishi talab etiladi.
Hozircha elektron ruxsatnoma uchun to‘lov miqdori yakuniy tasdiqlanmagan. Ayrim manbalarda QazETA orqali oldindan rasmiylashtiriladigan ETA narxi 3 900 tenge, chegarada rasmiylashtirilganda esa 7 800 tenge bo‘lishi kutilayotgani aytilmoqda. Biroq Qozog‘iston Ichki ishlar vazirligi bu masala hali ochiqligicha qolayotganini bildirgan.
Rossiyaning RBC nashri ham yangi tartib Rossiya fuqarolariga ham taalluqli bo‘lishini yozdi. Nashr Qozog‘iston IIViga tayanib, elektron ruxsatnoma uchun to‘lov va tizimning ayrim yakuniy shartlari bo‘yicha qaror hali qabul qilinmaganini qayd etgan.
Rossiyaning Meduza nashri esa Serbiya Tashqi ishlar vazirligi ma’lumotlariga tayanib, ETA uchun 3 900 tenge atrofida to‘lov olinishi, chegarada rasmiylashtirilganda esa summa ikki baravar yuqori bo‘lishi mumkinligini xabar qilgan.
Qozog‘istonning rasmiy QazETA platformasi hozirning o‘zida O‘zbekiston va Qirg‘iziston fuqarolarining ID-kartalarini ETA uchun qabul qilinadigan hujjatlar qatorida ko‘rsatmoqda.
Shu bilan birga, ETA vizaning o‘zi emas va uning joriy etilishi Qozog‘istonning vizasiz rejimini bekor qilmaydi. Tizim xorijliklarning mamlakatga safaridan oldin elektron tarzda ruxsat olishini nazarda tutadi.
