Qozog’istonda Kongo-Qrim gemorragik bezgagi tarqaldi: kasallanganlar orasida oʻzbekistonliklar ham bor
Rasmiy ma’lumotlarga koʻra, barcha holatlar yil boshidan buyon qayd etilgan. Mutaxassislarning aytishicha, infeksiya asosan chorva mollari bilan yaqin aloqada boʻlganda yuqadi. Bu haqda Turkiston viloyati sanitariya va epidemiologiya nazorati departamenti rahbari Nurbek Nishanov matbuot anjumanida ma’lum qildi.
Nurbek Nishanovning so’zlariga koʻra, olti oy ichida roʻyxatga olingan sakkizta holatdan oltitasida kasallanganlar chorva mollarini parvarish qilish va hayvonlar bilan yaqin bo’lish paytida infeksiyani yuqtirib olgan. Yana bir holatda esa kana odamni oʻz hovlisida oʻt oʻrayotganda tishlab olgan.
Kongo-Qrim gemorragik bezgagi - kana tishlashi orqali tarqaladigan ogʻir yuqumli kasallik. U organizmning kuchli zaharlanishi, teri va ichki a’zolarda qon quyilishlarini keltirib chiqaradi. Qozogʻistonning janubiy hududlari, jumladan Turkiston viloyati, ushbu infeksiyaning tabiiy oʻchoqlari hisoblanadi.
Rasmiy statistika shuni koʻrsatadiki, 2002-yildan buyon Turkiston viloyatida ushbu xavfli kasallik bilan bogʻliq 39 ta holat aniqlangan. Har yili, ayniqsa bahor va yoz oylarida, mahalliy aholi kana tishlashidan keyin shifokorlarga murojaat qiladi.
Shifokorlar aholini ogohlantirib, koʻchada yopiq kiyim kiyishni va uyga qaytgach badanni diqqat bilan koʻzdan kechirishni tavsiya etmoqda. Mutaxassislarning ta’kidlashicha, oddiy ehtiyot choralariga rioya qilish kasallikning oldini olishda muhim ahamiyatga ega.
