Qozog‘iston ikki oyda korrupsiyadan 8 mln dollar zarar ko‘rdi
Bugun, 2026-yil 7-sentabr kuni Qozog‘iston Milliy xavfsizlik qo‘mitasi (MXQ) joriy yilning iyul va avgust oylarida korrupsiyaga qarshi kurashish bo‘yicha amalga oshirilgan ishlar natijalarini e’lon qildi. Unga ko‘ra, korrupsiya orqali 3,7 mlrd tenge (8 mln dollar) zarar yetkazilgan.
Qo‘mita ma’lumotlariga ko‘ra, yozning ikki oyi davomida 201 ta korrupsiyaviy huquqbuzarlik ro‘yxatga olingan.
“Korrupsiya holatlarining aksariyati poraxo‘rlik, talon-toroj qilish, firibgarlik, mansab vakolatini suiiste’mol qilish va vakolat doirasidan chetga chiqish kabi jinoyatlar bilan bog‘liq”, — deya izoh berdi MXQ.
Shuningdek, jinoyat ishlari doirasida 140 kishi gumonlanuvchi deb topilgani qayd etildi.
“126 ta jinoyat ishi bo‘yicha tergov yakunlandi, ulardan 110 tasi sudga yuborildi. Yakunlangan jinoyat ishlari bo‘yicha aniqlangan zarar miqdori 3,7 mlrd tengeni tashkil etdi”, — deyiladi MXQ matbuot xizmati xabarida.
