Qozog’istonda erini o’ldirishda ayblangan ayol sudda oqlandi
Lidiya ismli oliy ma’lumotli ingliz tili o‘qituvchisi, oilasini o‘zi tebratayotgan bosiq va mehnatkash ayol edi. Mast er muntazam ravishda uni va bolalarini kaltaklar, qahratonda oynalarni sindirib, ularni ko‘chaga quvardi. Bir safar navbatdagi kaltaklardan so‘ng Lidiyada gematoma paydo bo‘lib, unda qon ketishi boshlangan.
Erining xulqi sababli ayol ikki marta tanosil kasalliklarini ham orttirgan. Uyda doimiy baqir-chaqir eshitilar, Lidiya bir necha bor ko‘zda yosh bilan qo‘shnilardan militsiya chaqirishni so‘ragan, ammo er uning ortidan tahdid bilan quvib kelgan.
Fojia arafasida Lidiya erining xiyonatidan xabar topgan. Uyga kelgan er buni g‘urur bilan tan olib, homilador ayolidan ichki kiyimlarini yuvishni talab qilgan. Lidiya rad etib, ajrashishini aytganida esa, er uni ayovsiz kaltaklab, to‘g‘ridan-to‘g‘ri jinsiy a’zolari va sonlariga tepgan.
Shundan so'ng, qornidagi go‘dagining hayotidan qo‘rqib ketgan ayol ko‘chaga otilgan. Avval erining qarindoshidan, so‘ng qo‘shnisidan militsiyaga qo‘ng‘iroq qilish uchun telefon so‘ragan biroq hech kim unga yordam bermagan.
Erining xiyonati va xaqoratomuz talablariga chiday olmagan Lidiya bo‘lajak farzandini himoya qilish uchun eriga pichoq urgan.
Hakamlar hay’ati adolatli to‘xtamga keldi: qasddan odam o‘ldirish — bu o‘ldirish niyati bo‘lganda sodir bo‘ladi, umidsizlikka tushgan ayol navbatdagi tajovuzdan qutulishga urinayotganda emas. Lidiya to‘g‘ridan-to‘g‘ri sud zalidan ozodlikka chiqarildi.
