Qirg‘izistonga o‘tgan Cho‘ng‘arada aholi yangi fuqarolikka o‘tishni boshladi
Ikki davlat vakillari boshchiligida tuzilgan ushbu ishchi guruhi hududlar almashinuvi chog‘ida aholining fuqarolik masalalarini hal etish va ko‘chirish ishlarini tashkillashtirish bilan shug‘ullanadi. Xususan, Qirg‘iziston yurisdiksiyasiga o‘tgan Cho‘ng‘ara qishlog‘i aholisiga fuqarolikni rasmiylashtirish jarayoni boshlab yuborildi. Shuningdek, Tashtepa qishlog‘ini ham topshirish bo‘yicha tegishli amallar yo‘lga qo‘yilgan.
Guruh zimmasiga fuqarolarning mulkiy huquqlarini rasmiylashtirish, davlat obyektlarini qabul qilish hamda topshirish va yerdan foydalanish tartibini belgilash kabi huquqiy-iqtisodiy vazifalar yuklatilgan. Shu bilan birga, almashiladigan hududlardagi o‘quvchilar va talabalarning ta’lim olish jarayoni uzluksiz davom etishi har ikki davlat tomonidan to‘liq kafolatlanadi.
Ayni paytda ishchi guruh a’zolari bevosita chegara hududlariga chiqib, joylardagi holatni o‘rganishni boshlagan. Ular yuzaga kelayotgan masalalarni tezkor hal etish choralarini ko‘rib, bajarilgan ishlar yuzasidan komissiya hamraislariga muntazam hisobot berib boradi.
Avval ham Farg‘onaning ikkita qishlog‘i qo‘shni davlatga o‘tkazilgani haqida xabar qilgan edik.
