Qirg‘iziston chegarasidan qaytarilgan 28 tonna sabzavot muammosi hal etildi
Avvalroq Farg‘onada yetishtirilgan 28 tonna qishloq xo‘jaligi mahsulotining Qirg‘izistonga o‘tkazilmagani haqida xabar bergan edik, qayd etiladiki mas’ul idoralar tomonidan tezkor surishtiruv o‘tkazilgan.
Qirg‘iziston vakolatli organlari bilan muloqot va “E-fito.uz” axborot tizimi tahlili shuni ko‘rsatdiki, yuk “O‘zbekiston” chegara postida fitosanitar talablar emas, balki qadoqlardagi markirovka qoidalariga rioya qilinmagani sababli to‘xtatilgan.
Yuk egasi markirovkaga oid mavjud kamchiliklarni tezkor ravishda bartaraf etgan. Shundan so‘ng mahsulotlar Qirg‘iziston hududiga muvaffaqiyatli olib kirilib, sotuvga chiqarilishiga ruxsat berilgan. Qo‘shni davlat qonunchiligiga ko‘ra, import qilinadigan meva-sabzavotlarning har bir qadog‘ida mahsulot nomi, kelib chiqish mamlakati va eksportchi haqidagi ma’lumotlar aks etishi shart.
Qo‘mita ushbu holat munosabati bilan barcha eksportchi va tadbirkorlarni ogohlikka chaqirdi. Chet elga qishloq xo‘jaligi mahsulotlarini yo‘naltirayotgan tadbirkorlar nafaqat fitosanitar sertifikatlarga, balki hamkor mamlakatlarning qadoqlash hamda markirovka standartlariga ham qat’iy rioya etishlari lozimligi eslatib o‘tilgan.
