Qashqadaryoda quturishdan o‘lim bo‘lgani haqidagi xabarlar yuzasidan rasmiy bayonot berildi
Ma’lum qilindiki, Kitob tumanida yashovchi 1979-yilda tug‘ilgan fuqaro tulki bolasi tirnaganidan taxminan bir oy o‘tib shifoxonaga yotqizilgan. Bemor 11-iyul kuni vafot etgan, uning o‘limi sabablari bo‘yicha sud-tibbiy ekspertizasi tayinlangan.
Epidemiologik surishtiruv davomida fuqaro taxminan bir oy avval tulki bolasi tomonidan tirnalgani aniqlangan. Shuningdek, marhum bilan aloqada bo‘lgan uch nafar fuqaro ehtiyot chorasi sifatida tibbiy ko‘rikdan o‘tkazilgan. Ularda quturish kasalligining klinik belgilari aniqlanmagan. Ayni vaqtda ular shifokorlar nazoratiga olinib, zarur profilaktik emlash ishlari olib borilmoqda.
Viloyat Sog‘liqni saqlash boshqarmasi, Sanitariya-epidemiologik osoyishtalik va jamoat salomatligi xizmati hamda veterinariya mutaxassislari hamkorligida Kitob tumanidagi epidemiologik vaziyat to‘liq nazoratga olingani bildirildi.
Shuningdek, boshqarma ijtimoiy tarmoqlarda tarqalayotgan bir oilaning uch nafar a’zosida quturish aniqlangani haqidagi ma’lumotlar tasdiqlanmaganini bildirib, fuqarolarni vahimaga berilmaslikka hamda tekshirilmagan xabarlarni tarqatmaslikka chaqirdi.
