Prezident sovg‘asidagi brelok sumkaga noto‘g‘ri taqilsa o‘qituvchilar jazolanadimi?
Yangi 2026-2027-o‘quv yilida maktab ostonasiga qadam qo‘ygan 1-sinf o‘quvchilariga berilgan an’anaviy sovg‘alar tarkibiga bu safar Davlat gerbi va bayrog‘i tasvirlangan maxsus ilgichlar (breloklar) ham kiritilgan edi. Tarmoqlarda tarqalgan xabarlarda ushbu atributni sumkaning faqat muayyan bir nuqtasiga taqish majburiy qilib qo‘yilgani va bunga amal qilmagan pedagoglar intizomiy javobgarlikka tortilishi iddao qilingan.
Toshkent shahar maktabgacha va maktab ta’limi boshqarmasi ma’lum qilishicha, brelokni sumkaga taqish bo‘yicha ko‘rsatmalar majburiyat emas, balki shunchaki tavsiya xarakteriga ega. Unga ko‘ra, o‘quvchi brelokni qanday yoki qayerga taqishidan qat’i nazar, bu holat intizomiy buzilish hisoblanmaydi.
Boshqarma mas’ullari ushbu tavsiyaga amal qilinmagani sababli o‘qituvchi va pedagoglarga nisbatan biron-bir chora yoki jazo qo‘llanilishi haqidagi mish-mishlar mutlaqo asossiz va haqiqatga zid ekanini ta’kidladi. Shu tariqa, sovg‘a tarkibidagi aksessuardan foydalanish borasida hech qanday qat’iy taqiq yoki majburiyat mavjud emasligi bildirildi.
