Prezident Bekobodda yangi Quyuv-prokatlash majmuasini ishga tushirdi
Prezident ramziy tugmani bosib, majmua faoliyatiga start berdi hamda kombinat jamoasi, faxriylar va xorijiy hamkorlarni tabrikladi. Raqamli yechimlar va energiya tejamkor texnologiyalarga asoslangan ushbu majmua kombinatda ishlab chiqarish unumdorligi va mahsulot sifatini oshirishga xizmat qiladi. Ilgari asosan qurilish sohasi bilan cheklangan kombinat bugungi kunda mashinasozlik, elektrotexnika, mudofaa sanoati va energetika uchun 80 turdagi yangi mahsulot yetkazib bermoqda.
Kelgusi besh yilda O‘zbekiston iqtisodiyotiga 180 milliard dollar investitsiya jalb etish, 27 milliard dollarlik infratuzilma loyihalarini amalga oshirish va 800 ming xonadonli uy-joylar barpo etish rejalashtirilgan. Mazkur marralar metall mahsulotlariga bo‘lgan talabni 1,5 barobar oshiradi. Shu sababli 5,5 mingdan ortiq ishchiga ega korxonaning iqtisodiyotdagi o‘rni muhim ahamiyatga ega.
Yangi majmuaning ishga tushirilishi natijasida yiliga 8 trillion so‘mlik 1 million tonna issiq prokatlangan po‘lat list ishlab chiqariladi. Bu Toshkent va Samarqand metallurgiya zavodlarining xomashyoga bo‘lgan ehtiyojini to‘liq qoplaydi. Loyiha doirasida 1 ming 200 ta yuqori daromadli yangi ish o‘rni yaratiladi.
