Poytaxtning “Qatortol” ko‘chasidagi piyodalar yo‘laklarini egallagan obyektlar olib tashlanmoqda
Toshkentning Chilonzor tumani Qatortol ko‘chasida piyodalar yo‘laklarini egallab turgan noqonuniy obyektlar demontaj qilinmoqda. Bu haqda poytaxt hokimligi xabar berdi.
Hokimlik ma’lumotiga ko‘ra, Qatortol ko‘chasi va bozori hududida uzoq yillar davomida trotuarlarni egallab turgan o‘zboshimchalik bilan qurilgan obyektlarni olib tashlanmoqda. Noqonuniy qurilmalar sabab piyodalar ko‘pincha avtomobillar qatnov qismidan harakatlanishga majbur bo‘lgan.
Qayd etilishicha, demontaj ishlari piyodalar, jumladan bolalar, keksalar, nogironligi bo‘lgan shaxslar va bolalar aravachasi bilan harakatlanuvchi ota-onalar uchun xavfsiz va qulay sharoit yaratishga qaratilgan.
Shuningdek, mas’ullar Chilonzor tumanidagi “Zarqo‘rg‘on” mahallasida amalga oshirilayotgan obodonlashtirish ishlari, “Navbahor” mahallasida elektr ta’minoti ishonchliligini oshirish bo‘yicha olib borilayotgan chora-tadbirlar hamda “Lutfiy” mahallasidagi GES-9 podstansiyasi ham ko'zdan kechirilgan.
