Polshada odam o‘limiga sabab bo‘lgan o‘zbekistonlik muddatidan avval ozod qilinib, vatanga qaytarildi
Polshada jazo muddatini o‘tayotgan O‘zbekiston fuqarosi I.M. muddatidan avval shartli ravishda ozod qilindi. Bu haqda “Dunyo” AA xabar berdi.
Namanganlik ushbu fuqaro Polshada odam o‘limiga olib kelgan yo‘l-transport hodisasini sodir etgani uchun 3 yil muddatga ozodlikdan mahrum etilgan edi. O‘zbekiston elchixonasi diplomatlari, “Artur Grabovski” advokatlik byurosi hamda Polsha Chegara xizmati o‘rtasida olib borilgan muzokaralar natijasida u muddatidan oldin ozodlikka chiqarildi.
Elchixona hamda Yevropa Ittifoqining Chegara va sohil xavfsizligi agentligi (Frontex) ko‘magida fuqaroga “Varshava–Toshkent” yo‘nalishi bo‘yicha aviachipta xarid qilinib, u O‘zbekistonga kuzatib qo‘yilgan.
