Pokistonda avtobus jarlikka qulab tushishi oqibatida 40 kishi halok bo‘ldi
Bugun, 3-iyul kuni Pokistonning Balujiston va Xayber Paxtunxva viloyatlari chegarasidagi tog‘li Dana Sar hududida yo‘lovchi avtobusi chuqur jarlikka qulab ketishi natijasida 40 kishi halok bo‘ldi, yana 8 kishi turli darajada tan jarohat olgan.
Ma’lum qilindiki, avtobus Balujiston viloyati markazi Kvetta shahridan Xayber Paxtunxva viloyatining Peshovar shahriga yo‘l olgan. Katta tezlikda harakatlangan va yo‘lovchilar bilan me’yoridan ortiq to‘ldirilgan avtobus haydovchisi boshqaruvni yo‘qotgan, natijada transport vositasi taxminan 20–25 metr chuqurlikdagi jarlikka qulab tushgan.
Hodisa joyiga qutqaruv xizmatlari zudlik bilan yetib borib, jarohatlanganlarni Jhob tuman shifoxonasiga yetkazgan. Halok bo‘lganlarning shaxsi aniqlanmoqda.
Voqea yuzasidan tergov boshlangan. Rasmiylar avtohalokat sabablarini aniqlash ustida ishlamoqda.
