Pastdarg‘omdagi qo‘y bozorida fuqaro qo‘y sotib, soxta 700 dollar olganini aytmoqda
Samarqand viloyati Pastdarg‘om tumanidagi chorva mollari bozorida qo‘y sotgan fuqaro xaridordan olgan 700 AQSh dollari qalbaki bo‘lib chiqqanini ma’lum qildi.
Murojaatchi Portal24’ga aytdiki, u bozorda ikki dona qo‘yini sotgan. Buning evaziga xaridor undan 700 ming so‘m va 700 AQSh dollari bergan.
Fuqaro pulni bozor hududida taxminan soat 05:30 larda olganini bildirdi. Uning aytishicha, dollarlarni olgan vaqtda ko‘zdan kechirgan va kupyuralar bir-biriga o‘xshash bo‘lgani sababli shubhalanmagan.
Keyinchalik, taxminan soat 10:00 larda, Pastdarg‘om tumanidagi kiyim bozoriga borib, 700 dollarni valyutachilarga almashtirmoqchi bo‘lganida, ular pullar qalbaki ekanini aytishgan.
Murojaatchining so‘zlariga ko‘ra, u xaridorni shaxsan tanimaydi. Voqeadan xabar topganidan so‘ng huquqni muhofaza qiluvchi organlarning 102 va 1102 raqamlariga bir necha bor murojaat qilganini bildirgan.
Uning aytishicha, murojaatidan uch kun o‘tgan bo‘lsa-da, hozircha masala bo‘yicha natija bo‘lmagan. Bugun esa uchastka noziri uni chaqirib, bozor hududidagi videokuzatuv kameralarini birgalikda ko‘rgan.
Murojaatchi kamera yozuvida xaridor aniq ko‘rinmayotganini, boshqa kameralarni ham ko‘rishni so‘raganida esa bozor hududida boshqa kamera yo‘qligi aytilganini bildirdi.
Ayni paytda fuqaro holatga aniqlik kiritilishi, voqea yuzasidan tegishli surishtiruv o‘tkazilishi va qalbaki valyutani bergan shaxsni aniqlashda amaliy yordam ko‘rsatilishini so‘ramoqda.
Mazkur holatda fuqaro haqiqatan ham qalbaki valyuta orqali aldangan bo‘lsa, ushbu shaxs yoki shaxslar bundan avval ham boshqa fuqarolarni shu kabi usulda chuv tushirgan bo‘lishi ehtimolini istisno qilib bo‘lmaydi. Shu sababli voqea yuzasidan atroflicha surishtiruv o‘tkazib, qalbaki valyutani bergan shaxsni aniqlash muhim.
Zero, agar bu holat yakka tartibdagi hodisa bo‘lmasa, boshqa fuqarolar ham xuddi shunday usulda jabrlangan bo‘lishi mumkin. Shu munosabat bilan huquqni muhofaza qiluvchi va tegishli tashkilotlardan mazkur murojaatni nazoratga olib, holatga huquqiy baho berish hamda ehtimoliy boshqa jabrlanuvchilarni aniqlash choralarini ko‘rish so‘raladi.
