O‘zbekistonliklar dollar jamg‘arishdan voz kechmoqda. Yarim yilda aholi banklarga 12 mlrd dollar topshirgan
Markaziy bank e’lon qilgan “Jismoniy shaxslarning valyuta operatsiyalari” tahliliy sharhiga ko‘ra, joriy yilning dastlabki olti oyida umumiy valyuta aylanmasi 31 foizga o‘sib, 19,1 milliard dollarga yetdi. Fuqarolar banklarga 12,3 milliard dollar sotgan bir paytda, bor-yo‘g‘i 6,8 milliard dollar xarid qilgan. Natijada aholi tomonidan bank tizimiga kiritilgan sof valyuta hajmida 5,5 milliard dollarlik ijobiy tafovut hosil bo‘ldi.
Ushbu davrda xorijdan O‘zbekistonga o‘tkazilgan pul o‘tkazmalari hajmi 13 foizga ko‘payib, 9,3 milliard dollarni tashkil etdi. Regulyatorga ko‘ra, mehnat migrantlari ishlayotgan mamlakatlardagi yuqori ish haqi, ushbu davlatlar milliylashgan valyutalarining mustahkamlangani hamda P2P (kartadan kartaga) o‘tkazmalarining 32 foizga o‘sib, 4,8 milliard dollarga yetgani bu o‘sishni ta’minlagan asosiy omillardandir.
Shu bilan birga, O‘zbekistondan xorijga yuborilgan pul o‘tkazmalari 8 foizga oshib, 1,3 milliard dollarni tashkil qildi. Markaziy bank mutasaddilari tun-u kun ishlaydigan valyuta bankomatlari va masofaviy bank xizmatlarining kengayishi aholining rasmiy valyuta amaliyotlariga bo‘lgan ishonchi va qulayligini oshirayotganini ta’kidlamoqda.
