O‘zbekistonlik o‘quvchilar xalqaro olimpiadalarda 220 ta medalni qo‘lga kiritib, o‘tgan yilgi natijani yangiladi
Joriy yilda o‘quvchilar bir qator nufuzli musobaqalarda ilk bor qatnashib, yuqori natijalarni ko‘rsatdi. Xususan, Xalqaro sun’iy intellekt olimpiadasida 1 ta kumush va 2 ta bronza medali qo‘lga kiritilgan bo‘lsa, Abu Ali ibn Sino nomidagi xalqaro biologiya olimpiadasida terma jamoa 11 ta medal bilan umumjamoa hisobida yakka peshqadamga aylandi.
Shuningdek, Toshkent viloyatida o‘tkazilgan Al-Xorazmiy matematika va informatika olimpiadasida vakillarimiz 61 ta medalni qo‘lga kiritgan.
Aholisi va qamrovi bo‘yicha dunyoning eng nufuzli fan olimpiadalarida ham o‘zbekistonlik yoshlar 16 ta medalga sazovor bo‘lishdi. Xitoydagi Matematika olimpiadasi, Kolumbiyadagi Fizika olimpiadasi hamda Litvada o‘tgan Biologiya olimpiadasida vakillarimiz sovrindorlar safidan joy oldi. Mamlakatimizda 96 davlat ishtirokida o‘tkazilgan Xalqaro kimyo olimpiadasida esa 1 ta oltin va 3 ta kumush medal jamg‘arildi.
An’anaviy aniq va tabiiy fanlardan tashqari, gumanitar hamda iqtisodiy yo‘nalishlarda ham muvaffaqiyatlar qayd etildi. Germaniyada 51 mamlakat vakillari qatnashgan Nemis tili olimpiadasida 1 ta oltin va 1 ta bronza, Xitoyda tashkil etilgan Iqtisodiyot olimpiadasida esa 2 ta bronza medali qo‘lga kiritildi.
Ma’lumot uchun, 2025-yilda o‘zbekistonlik o‘quvchilar xalqaro musobaqalardan jami 210 ta medal bilan qaytishgan edi.
