O‘zbekistonlik dasturchi o‘quvchilar IOI 2026 olimpiadasida tarixiy rekord o‘rnatdi
Dunyoning 90 dan ziyod davlatidan kelgan iqtidorli yoshlar ishtirok etayotgan ushbu nufuzli intellektual musobaqada O‘zbekiston sharafini Ixtisoslashtirilgan ta’lim muassasalari agentligi maktablari o‘quvchilari munosib himoya qildi. Toshkent shahridagi Muhammad al-Xorazmiy nomidagi maktab o‘quvchisi Jaxonali Xaydaraliyev terma jamoaga kumush medalni taqdim etdi.
Shuningdek, Namangan shahridagi Prezident maktabi vakillari Jahongirshoh Avazxonov va Ulug‘bek Rahmatullayev hamda Nukus shahridagi Prezident maktabi o‘quvchisi Timur Kadirbergenov bronza medallarga ega chiqdi. Navoiy shahridagi Prezident maktabi o‘quvchisi Sardorbek Salimov esa diplom (Honorable Mention) e’tirofiga sazovor bo‘ldi.
Ma’lumot uchun, o‘zbekistonlik o‘quvchilar o‘tgan yili o‘tkazilgan Xalqaro informatika olimpiadasida 1 ta kumush va 1 ta bronza medal bilan cheklangan edi. Bu yilgi 4 ta medal esa O‘zbekiston terma jamoasining xalqaro informatika poygasidagi mutlaq rekordi bo‘ldi.
Avvalroq Telegram asoschisi Pavel Durov Toshkentdagi olimpiada g‘oliblariga 117 ming dollarlik mukofot ajratgandi.
