O‘zbekistonga yarim yilda rekord darajadagi 9,3 milliard dollar pul o‘tkazildi. Asosan mablag‘ qayerdan kelyapti?
Mehnat migratsiyasining diversifikatsiya qilinishi natijasida MDH davlatlarining pul o‘tkazmalaridagi umumiy ulushi 29 foizga kamaygan. Aksincha, Yevropa va AQShdan mablag‘ yuborish ko‘rsatkichlari keskin yuqoriladi. Xususan, pul o‘tkazmalari hajmi Buyuk Britaniyadan 62 foizga (144 mln dollar), Yevropa Ittifoqi mamlakatlaridan 27 foizga (319 mln dollar) va AQShdan 19 foizga (372 mln dollar) oshdi. Mutlaq ko‘rsatkichlar bo‘yicha Qozog‘istondan 469 mln, Janubiy Koreyadan 314 mln va Turkiyadan 303 mln dollar kelib tushgan.
Migratsiya agentligining harakatlari bilan rivojlangan davlatlardagi 325 dan ortiq yirik ish beruvchilar va rekruting kompaniyalari bilan hamkorlik yo‘lga qo‘yilgan. Natijada birgina joriy yilning o‘zida 124,5 ming nafar O‘zbekiston fuqarosi xorijda yuqori maoshli ish o‘rinlariga joylashtirildi. Bugungi kunda AQSh, Germaniya, Buyuk Britaniya, Italiya, Fransiya hamda Yaponiya kabi davlatlar o‘zbekistonlik ishchilar uchun asosiy yangi yo‘nalishlarga aylanmoqda.
Zamonaviy P2P (kartadan kartaga) o‘tkazmalari ilk bor an’anaviy xalqaro o‘tkazmalar tizimini ortda qoldirib, umumiy ulushning 51,7 foizini (4,8 mlrd dollar) tashkil etgan. Shuningdek, ushbu davrda O‘zbekistondan xorijga yuborilgan pul o‘tkazmalari hajmi ham 8 foizga ko‘payib, 1,3 milliard dollarga yetgani qayd etilgan.
