O‘zbekistondan Qozog‘istonga ko‘chib o‘tayotganlar soni keskin kamaydi, ammo yetakchilik barqaror
Statistik ma’lumotlarga ko‘ra, doimiy ko‘chib o‘tuvchilar soni keskin qisqarganiga qaramay, O‘zbekiston Qozog‘istonga immigratsiya oqimi bo‘yicha birinchi o‘rinni saqlab qolmoqda.
O‘zbekistondan borganlar Qozog‘istondagi umumiy tashqi migratsiya hajmining 36,1 foizini tashkil etdi. Ma’lumot uchun, 2025-yilning mos davrida O‘zbekistondan qo‘shni davlatga 5,7 mingga yaqin kishi doimiy yashash uchun ko‘chib o‘tgan edi.
Qozog‘istonga ko‘chib o‘tganlarning 2 mingga yaqini etnik qozoqlar hisoblanadi. Ularning asosiy qismi, ya’ni 60 foizdan ortig‘i Olmaota va Mangistau viloyatlarini muqim yashash manzili sifatida tanlagan. Yana 18,5 foiz immigrant esa Ostona va Olmaota shaharlarida qo‘nim topgan.
Qarama-qarshi yo‘nalishda, ya’ni Qozog‘istondan O‘zbekistonga doimiy yashash uchun ko‘chib kelganlar soni yarim yilda qariyb 40 kishini tashkil etdi. Shu tariqa, ikki mamlakat o‘rtasidagi doimiy migratsiya ayirmasi Qozog‘iston foydasiga ijobiy bo‘lib, 2 853 kishiga teng bo‘ldi.
