O‘zbekistonda xavfli kasalliklar tarqalganda aholi majburiy profilaktik emlanadi
Yangi belgilangan qoidalarga ko‘ra, profilaktik emlash tadbirlari Bosh davlat sanitariya vrachining maxsus qarori bilan joriy etiladi. Ma’lum bir hududda yuqumli xastalik tarqalishi, epidemiologik vaziyat keskinlashishi yoki xavfli guruhlar orasida yuqish xavfi ortishi emlashni yo‘lga qo‘yishga asos bo‘ladi. Jarayonda faqat davlat ro‘yxatidan o‘tgan hamda foydalanishga rasman ruxsat berilgan sifatli vaksinalardan foydalaniladi.
Emlash tadbirlari, eng avvalo, kasallikni yuqtirish ehtimoli yuqori bo‘lgan shaxslar, infeksiya o‘chog‘ida bemorlar bilan muloqotda bo‘lganlar hamda epidemiologik ko‘rsatmalarga tushuvchi aholi qatlami orasida o‘tkaziladi. Jarayon oldidan har bir fuqaro majburiy tibbiy ko‘rikdan o‘tkazilib, unda allergik reaksiyalar va emlashga qarshi boshqa tibbiy ko‘rsatmalar bor-yo‘qligi aniqlanadi. Shuningdek, fuqaroga vaksina xususiyati va emlashni rad etishning huquqiy oqibatlari haqida tushuntirish beriladi.
Jarayon shaffofligini ta’minlash maqsadida emlangan har bir fuqaro haqidagi ma’lumotlar darhol Yagona tibbiyot axborot tizimiga kiritib boriladi. Emlangan shaxs birinchi 30 daqiqa davomida tibbiyot muassasasida, keyingi 3 kun mobaynida esa shifokor hamda patronaj hamshirasining doimiy nazoratida bo‘ladi.
