O‘zbekistonda uch oyda noqonuniy chiqindi tashlaganlar 123 million so‘mdan ortiq jarimaga tortildi
Chiqindilarni boshqarish va sirkulyar iqtisodiyotni rivojlantirish agentligi ma’lumotlariga ko‘ra, yilning ikkinchi choragida chiqindilarni belgilanmagan joylarga tashlash bo‘yicha 1548 ta huquqbuzarlik qayd etilgan.
Ushbu qoidabuzarliklarning 1194 tasi fuqarolar, 354 tasi esa transport vositalari haydovchilari tomonidan sodir etilgan. Huquqbuzarlarning 16,9 foiziga nisbatan choralar ko‘rilib, jami 123 million 394 ming so‘m jarima qo‘llangan.
Hozirda respublika hududlarida o‘rnatilgan 700 dan ortiq onlayn kuzatuv kameralari nafaqat chiqindi tashlash, balki boshqa ekologik qonunbuzarliklarni ham aniqlamoqda. Amaldagi tartibga ko‘ra, belgilanmagan joyga chiqindi tashlash fuqarolarga 412 ming so‘mdan 1,236 million so‘mgacha, mansabdor shaxslarga esa 4,12 million so‘mdan 8,24 million so‘mgacha jarima solishga sabab bo‘ladi.
Ushbu qilmish bir yil davomida qayta sodir etilsa, jarima miqdori fuqarolar uchun 4,12 million so‘mgacha, mansabdor shaxslar uchun esa 12,36 million so‘mgacha ko‘tariladi.
