O‘zbekistonda tug‘ilishlar ko‘rsatkichi 2050-yilga borib 40 foizga ko‘payishi prognoz qilindi
“Oila va gender” ilmiy-tadqiqot instituti “Ichki va tashqi migratsiyaning demografik jarayonlar va oila institutiga uzoq muddatli ta’sirini baholash” ilmiy loyihasi doirasida O‘zbekistonda tug‘ilish ko‘rsatkichlarining uzoq muddatli prognozini ishlab chiqdi.
Prognozga ko‘ra, mamlakatda tug‘ilishlar soni kelgusi yillarda o‘sishda davom etadi:
- 2030-yilda — 892,7 ming nafar;
- 2040-yilda — 1 mln 16,1 ming nafar;
- 2050-yilda — 1 mln 234,1 ming nafar.
Shu tariqa, 2050-yilga kelib tug‘ilishlar soni 2025-yilga nisbatan 354,5 ming nafarga yoki 40,3 foizga oshishi kutilmoqda.
Hududlar orasida tug‘ilishlar sonining eng yuqori o‘sishi Toshkent viloyatida — 62 foiz va Toshkent shahrida — 61 foiz bo‘lishi prognoz qilingan. Keyingi o‘rinlarda Andijon — 48,6 foiz, Samarqand — 43,3 foiz va Namangan viloyati — 42,4 foiz bilan qayd etilgan.
Tug‘ilishning umumiy koeffitsiyenti 2030-yilda 21,2 promille, 2040-yilda 20,8 promille, 2050-yilda esa 21,9 promilleni tashkil etishi kutilmoqda.
2050-yilda tug‘ilish koeffitsiyenti eng yuqori bo‘lishi prognoz qilinayotgan hudud — Surxondaryo viloyati (24,7 promille). Undan keyin Qashqadaryo — 23,8, Namangan va Samarqand — 23,1, Andijon — 22,9 hamda Toshkent shahri — 22,3 promille bilan qayd etilgan.
Institut qayd etishicha, tug‘ilishlar sonining oshishi kelgusida ta’lim, sog‘liqni saqlash, maktabgacha ta’lim, uy-joy, ijtimoiy xizmatlar va mehnat bozori infratuzilmasiga bo‘lgan ehtiyojni ham oshiradi.
