O‘zbekistonda tilanchilik uchun jarimalar miqdori oshirildi
O‘zbekistonda tilanchilik qilish (ko‘chalarda, transport to‘xtash va jamoat joylarida pul, oziq-ovqat mahsulotlari va boshqa moddiy qimmatliklar berishni faol tarzda so‘rash), shuningdek, odamlarni bu ishga jalb etganlik uchun jarimalar miqdori oshirildi (Ma’muriy javobgarlik to‘g‘risidagi kodeksning 188-3-moddasi). Bu 14-oktabr kuni Prezident tomonidan imzolangan qonunda nazarda tutilgan. Yangi jarimalar shu kundan kuchga kirdi.
Tilanchilik bilan shug‘ullanganlik uchun endilikda bazaviy hisoblash miqdorining 3 baravaridan 5 baravarigacha jarima yoki 15 sutkagacha ma’muriy qamoq jazosi qo‘llaniladi. Avval BHMning 1 baravaridan 3 baravarigacha miqdorda jarima yoki 15 sutkagacha qamoq jazosi berilar edi.
Voyaga yetmagan hamda keksa yoshdagi shaxslarni, ruhiy holati buzilgan, nogironligi bo‘lgan shaxslarni va boshqa shaxslarni tilanchilik qilishga jalb etish, shuningdek ularga alkogolli ichimliklarni yoxud giyohvandlik moddalari yoki psixotrop moddalar bo‘lmagan, lekin shaxsning aql-idrokiga ta’sir ko‘rsatuvchi vositalarni majburan iste’mol qildirgan holda ularni tilanchilik qilishga jalb etganlik uchun BHMning 10 baravaridan 15 baravarigacha miqdorda jarima yoki 15 sutkagacha ma’muriy qamoq jazosi belgilandi (avval BHMning 5 baravaridan 10 baravarigacha miqdorda jarima yoki 15 sutkagacha qamoq edi).
O‘zbekistonda tilanchilik uchun ma’muriy va jinoiy javobgarlik 2019-yil boshida joriy etilgan edi.
