O‘zbekistonda taksichilar 8 oyda 7 trillion so‘mdan ko‘p pul ishladi
Soliq organlarining rasmiy ma’lumotlariga ko‘ra, sakkiz oy davomida taksi xizmatlari orqali 329 million marotaba yo‘lovchi tashilgan bo‘lib, tizimga jami 242 ta agregator integratsiya qilingan.
Umumiy aylanmaning 63,1 foizi, ya’ni 4,5 trillion so‘mi naqd pulda, 2,6 trillion so‘mdan ortig‘i esa naqdsiz shaklda amalga oshirilgan. Bir marta taksiga o‘tirish uchun to‘langan o‘rtacha chek summasi esa 21 785 so‘mni tashkil qildi.
Bugungi kunda ushbu sohada 481 mingdan ortiq o‘zini o‘zi band qilgan fuqaro, jumladan 4 ming nafardan ziyod ayollar mehnat qilmoqda. Daromadlar tahliliga ko‘ra, 7,9 mingdan ziyod haydovchining 8 oylik tushumi 100 million so‘mdan oshgan. Shuningdek, 31,5 ming kishi 50 milliondan 100 million so‘mgacha, 124 mingdan ortiq haydovchi esa 10 milliondan 50 million so‘mgacha daromad ko‘rgan.
Taksi agregatorlarida foydalanilayotgan avtomobillarning asosiy qismini Cobalt (27 foiz), Nexia (19,3 foiz) hamda Lacetti (16,1 foiz) rusumlari tashkil qilmoqda. Zamonaviy elektromobillar ulushi esa hozircha 2,5 foizga yetgan. Ta’kidlash joizki, taksi xizmatlarini ko‘rsatuvchi agregatorlar o‘tgan davr mobaynida davlat byudjetiga jami 149,2 milliard so‘m miqdorida soliq to‘lagan.
