O‘zbekistonda “Kreditga taqiq” xizmatidan foydalanuvchilar soni 2,5 milliondan oshdi
2026-yil 1-iyul holatiga ko‘ra, O‘zbekistonda 2 mln 574 ming 26 nafar jismoniy shaxs “Kreditga taqiq” xizmatiga ulangan. Bu haqda “KATM” Kredit byurosi ma’lum qildi.
Statistik ma’lumotlarga ko‘ra, xizmatdan foydalanuvchilarning 1 mln 497 ming 389 nafari erkaklar, 1 mln 76 ming 637 nafari ayollarni tashkil etmoqda.
Qayd etildiki, “Kreditga taqiq” xizmati fuqarolarni ularning nomiga noqonuniy kredit rasmiylashtirilishi bilan bog‘liq firibgarliklardan himoya qilishga xizmat qiladi. Foydalanuvchilar ushbu xizmatni mustaqil ravishda yoqish yoki o‘chirishi mumkin.
Xizmatni onlayn tarzda bir necha usul orqali faollashtirish yoki o‘chirish mumkin. Jumladan, “KATM” mobil ilovasining bosh sahifasidagi “Kreditga taqiq” bo‘limi orqali, Kredit byurosining rasmiy veb-saytidagi shaxsiy kabinet orqali hamda Yagona interaktiv davlat xizmatlari portali (my.gov.uz) va uning mobil ilovasidagi “Kredit bitimini tuzishga taqiq qo‘yish yoki taqiqni olib tashlash” xizmati orqali foydalanish mumkin.
Bundan tashqari, xizmatni oflayn tarzda ham yoqish yoki o‘chirish imkoniyati mavjud. Buning uchun fuqarolar mamlakatdagi istalgan Davlat xizmatlari markazi yoki “KATM” Kredit byurosiga shaxsan murojaat qilishi mumkin.
“KATM” Kredit byurosi ushbu xizmat mutlaqo bepul ekanini eslatib, fuqarolarni firibgarlik holatlarining oldini olish maqsadida undan foydalanishga chaqirdi.
