O‘zbekistonda it va mushuklarga “pasport” beriladi
Mamlakatda “Hayvonlarni identifikatsiya qilish, ro‘yxatga olish va kuzatish to‘g‘risida”gi qonun amaliyotga tatbiq etilmoqda. Veterinariya va chorvachilikni rivojlantirish qo‘mitasi ushbu jarayonni nazorat qiluvchi mas’ul organ etib belgilandi.
Hujjatga ko‘ra, har bir turdagi hayvon tug‘ilgandan so‘ng ma’lum muddat o‘tib, bir oy ichida ro‘yxatga olinishi lozim. Xususan, qoramol, qo‘y, echki va tuyalar 14 kunlik bo‘lganda, cho‘chqalar 1 oylik, it hamda mushuklar 3 oylik, otlar esa 4 oylik bo‘lganda ushbu tartibdan o‘tkazilishi shart.
Chet eldan olib kirilgan hayvonlarni 21 kun ichida hisobga qo‘yish, hayvon so‘yilgan, o‘lgan yoki mamlakatdan olib chiqib ketilgan holatlarda esa 7 kun muddatda hisobdan chiqarish talab etiladi.
Barcha tadbirlar egasining o‘z mablag‘i, davlat budjeti va homiylik xarajatlari evaziga bajariladi. Shuningdek, bepul identifikatsiya qilish tartibi va bosqichlari Hukumat tomonidan alohida belgilanadi.
Qonunning hayvon egalariga identifikatsiya qilinmagan va ro‘yxatga olinmagan jonli mavjudotlarni saqlash hamda ko‘paytirishni taqiqlovchi asosiy majburiyatlari 2028-yilning 1-yanvaridan boshlab to‘liq kuchga kiradi.
