O‘zbekistonda imtiyozli transport xizmatlaridan foydalanish tartibi soddalashtiriladi
O‘zbekistonda imtiyozli transport xizmatlaridan foydalanish tartibi soddalashtiriladi. Endilikda qog‘oz talonlar bekor qilinib, imtiyozli avia, temir yo‘l va shaharlararo transport chiptalarini rasmiylashtirish uchun ID-karta yoki biometrik pasportni taqdim etish kifoya qiladi.Bu haqda prezident Shavkat Mirziyoyevga imtiyozli transport xizmatlarini raqamlashtirishga qaratilgan takliflar taqdimotida so‘z yuritildi.
Ma’lum qilindiki, bugungi kunda 1941–1945-yillardagi urush nogironlari va qatnashchilari, ularga tenglashtirilgan shaxslar hamda Chernobil AESdagi halokat oqibatlarini bartaraf etishda qatnashgan 48,4 mingdan ortiq fuqaro imtiyozli transport xizmatlaridan foydalanish huquqiga ega. 2025-yilda ular ushbu xizmatlardan 1,7 million marta foydalangan.
Yangi tartibga ko‘ra, 11 toifadagi fuqarolarga havo, temir yo‘l va shaharlararo transportda bepul qatnov yoki 50 foizlik chegirma taqdim etiladi. Qog‘oz talonlar bekor qilinadi, chipta xarid qilish uchun ID-karta yoki biometrik pasportni taqdim etishning o‘zi kifoya qiladi. Imtiyoz huquqi “Yagona milliy ijtimoiy himoya” axborot tizimi orqali tekshiriladi.
Shuningdek, 2027-yil 1-yanvardan boshlab imtiyozli avia, temir yo‘l va shaharlararo avtobus chiptalarini “Baraka” ijtimoiy karta mobil ilovasi orqali onlayn xarid qilish imkoniyati yaratiladi.
Prezident yangi xizmatlarni hududlarda sifatli yo‘lga qo‘yish hamda belgilangan chora-tadbirlar ijrosini qat’iy nazorat qilish bo‘yicha topshiriqlar berdi.
