O'zbekistonda ilk bor xalqaro islom forumi o'tkaziladi
Joriy yilning, 7–11 iyul kunlari Oʻzbekiston yana bir muhim xalqaro tadbirga mezbonlik qiladi. Toshkent va Samarqand shaharlarida “Islom sivilizatsiyasi: tinchlik, bagʻrikenglik va ma’rifat yoʻli” nomi ostidagi ilk Xalqaro Islom forumi oʻtkazilishi rejalashtirilgan.
Mazkur nufuzli forum Oʻzbekistondagi Islom sivilizatsiyasi markazi hamda Islom ta’lim, fan va madaniyat tashkiloti (ICESCO) hamkorligida tashkil etilmoqda.
Tadbir islom olamining turli mamlakatlaridan yetakchi olimlar, diniy ulamolar, xalqaro tashkilotlar rahbarlari, shuningdek, universitetlar, muzeylar, kutubxonalar va gumanitar soha vakillarini bir maydonda jamlaydi. Ular o‘zaro ilmiy muloqot va tajriba almashish imkoniga ega bo‘lishadi.
Forum davomida islom sivilizatsiyasining jahon ilm-fani, ta’limi, madaniyati, falsafasi, san’ati hamda ma’naviy meros rivojiga qo‘shgan ulkan hissasi atroflicha muhokama qilinadi. Shuningdek, sivilizatsiyalararo hamkorlikni mustahkamlash va o‘zaro anglashuvni kengaytirish masalalari ham kun tartibidan o‘rin oladi.
Dastur doirasida yalpi majlislar, xalqaro ilmiy konferensiyalar, yetakchi olimlar va diniy arboblar bilan uchrashuvlar, shuningdek, Toshkentdagi Islom sivilizatsiyasi markazi hamda Samarqanddagi Imom Buxoriy yodgorlik majmuasiga tashriflar tashkil etiladi.
Bundan tashqari, islom san’ati, xattotlik va qo‘lyozma merosiga bag‘ishlangan ko‘rgazmalar ham o‘tkazilishi ko‘zda tutilgan. Ushbu forum islom madaniy va ilmiy merosini asrab-avaylash, uni keng targ‘ib qilishga qaratilgan keng ko‘lamli tashabbuslar doirasida amalga oshirilmoqda. 2026- yil mart oyida Toshkentda ochilgan Islom sivilizatsiyasi markazi esa bu yo‘nalishdagi eng yirik ma’rifiy loyihalardan biri sifatida e’tirof etilmoqda.
