O’zbekistonda rektor lavozimiga tayinlanish shakli o‘zgardi
Adliya vazirligi tomonidan ma’lum qilindiki, “Yangi O‘zbekiston” universitetida davlat oliy ta’lim muassasalari rektori lavozimiga nomzodlarni tayyorlashga mo‘ljallangan “Rektorlar maktabi” dasturiga qabul qilish tartibini belgilovchi nizom davlat ro‘yxatidan o‘tkazildi.
Nizomga muvofiq, dasturda ishtirok etish uchun nomzod 30 yoshga to‘lgan, kamida magistr akademik darajasiga ega bo‘lishi hamda oliy ta’lim tizimida kamida 5 yillik ish tajribasiga ega bo‘lishi lozim. Shuningdek, ushbu muddatning kamida 2 yili rahbarlik lavozimlarida faoliyat yuritgan bo‘lishi talab etiladi. Qabul ochiq tanlov asosida amalga oshiriladi.
Vazirlar Mahkamasining 2026-yil 16-apreldagi 177-son qaroriga asosan, davlat oliy ta’lim muassasalari rektori lavozimiga nomzodlar faqat “Rektorlar maktabi” dasturini muvaffaqiyatli yakunlagan va rektorlar zaxirasiga kiritilgan shaxslar orasidan tanlab olinadi.
Qabul jarayoni quyidagi 4 bosqichda o‘tkaziladi:
1.Hujjatlarni qabul qilish va ko‘rib chiqish;
2.Test sinovlarini o‘tkazish;
3.Psixologik baholash;
4.Suhbat.
Nomzodlarning test, psixologik baholash va suhbat natijalarida jamg‘argan umumiy ballari asosida reyting tuziladi. Belgilangan qabul kvotasi doirasida eng yuqori natija ko‘rsatgan nomzodlar o‘qishga tavsiya etiladi.
Bundan tashqari, nizomda hujjatlarni topshirish tartibi, baholash mezonlari, natijalarni e’lon qilish, apellyatsiya jarayoni hamda qabulning ochiqligi va shaffofligini ta’minlash mexanizmlari ham belgilab qo‘yilgan.
