O‘zbekistonda elektr energiyasi iste’moli bo‘yicha yangi rekord qayd etildi
Issiq ob-havo sharoitida respublika bo‘yicha sutkalik elektr energiyasi iste’moli hajmi 278,6 million kVt/soatga yetdi. Bu ko‘rsatkich 2025-yil 18-iyulda qayd etilgan avvalgi rekorddan (272,6 million kVt/soat) 6 million kVt/soatga yoki 2,2 foizga ko‘pdir. Shuningdek, 13-iyul kuni mamlakatda jami 281,5 million kVt/soat elektr energiyasi ishlab chiqarilgan.
Havo harorati yuqori bo‘lib turgan ayni kunlarda tizim yuklamasini kamaytirish va elektr ta’minoti barqarorligini ta’minlash maqsadida soha korxonalarida kuchaytirilgan ish rejimi joriy etilgan bo‘lib, maxsus avariya-ta’mirlash brigadalari navbatchiligi yo‘lga qo‘yilgan.
Shunga qaramay, tarmoqlarda texnik nosozliklar tufayli vaqtinchalik uzilishlar kuzatilishi mumkin. Energetika vazirligi iste’molchilardan tarmoqqa tushayotgan yuklamani kamaytirish hamda uzilishlarning oldini olish maqsadida, ayniqsa eng yuqori yuklama soatlarida, elektr energiyasidan oqilona va tejamkorlik bilan foydalanishni so‘radi.
