O‘zbekistonda daraxt kesganlar va noqonuniy chiqindi tashlaganlar ommaviy jarimaga tortilmoqda
Ekologiya va iqlim o‘zgarishi milliy qo‘mitasi ma’lumotlariga ko‘ra, tadbir boshlanganidan buyon Ekopolitsiya hamda uning hududiy bo‘linmalari tomonidan jami 347 ta ekologik qonunbuzarlik holati aniqlangan.
Shundan 62 tasi daraxtlarni noqonuniy chopish hamda ularga shikast yetkazish bilan bog‘liq. Aybdorlarga Ma’muriy javobgarlik to‘g‘risidagi kodeksning 79-moddasi bo‘yicha jarimalar solinib, tabiatga yetkazilgan zarar miqdori hisoblab chiqildi. Masalan, birgina 3-avgust kuni Buxoro, Samarqand, Sirdaryo, Toshkent viloyatlari va poytaxtda shunday 5 ta holat ro‘yxatga olingan.
Bundan tashqari, chiqindilar bilan bog‘liq qoidalarni buzish bo‘yicha 285 ta holat aniqlanib, ma’muriy choralar ko‘rilgan. Xususan, 3-avgustning o‘zida Qoraqalpog‘iston, Navoiy, Samarqand, Surxondaryo, Toshkent va Xorazm viloyatlari hamda Toshkent shahrida 17 ta qoidabuzarlik qayd etildi. Nazorat reydlari respublika bo‘ylab davom etmoqda.
