O‘zbekistonda bug‘doyzorlarni yoqqan 172 kishi salkam 1 milliard so‘m tovon va jarimaga tortildi
Respublika bo‘yicha nazorat tadbirlari va sun’iy yo‘ldosh orqali kosmik suratlarni tahlil qilish natijasida 744 ta bug‘doydan bo‘shagan er maydonida yonish holatlari aniqlangan. Hozircha dalalarga o‘t qo‘ygan 172 nafar shaxsga nisbatan ma’muriy choralar ko‘rildi.
Ma’muriy jarima: 212,5 million so‘m, tabiatga yetkazilgan zarar tovoni: 652,3 million so‘m.
Tahlillarga ko‘ra, bug‘doy ang‘izlarini yoqish va tabiatga zarar yetkazish ko‘rsatkichlari quyidagi viloyatlarda eng yuqori bo‘lib turibdi va u yerda nazorat kuchaytirilgan:
Andijon viloyati – 348 ta holat;
Toshkent viloyati – 127 ta holat;
Surxondaryo viloyati – 95 ta holat.
Ekologiya qo‘mitasi hududiy bosh boshqarmalari tomonidan ang‘iz yoqishning oldini olish maqsadida 7 760 ta fermer xo‘jaligiga rasmiy ogohlantirish xatlari tarqatilgan.
Bundan tashqari, dala va aholi punktlarida xazon, shox-shabba hamda o‘simlik qoldiqlarini yoqqan shaxslarga nisbatan ham reydlar o‘tkazilmoqda. Hozirga qadar bunday qonunbuzarliklar bo‘yicha 9 ming 821 ta ma’muriy bayonnoma rasmiylashtirilgan.
