O‘zbekistonda bozor xizmatlari hajmi 665 trln so‘mga yetdi. Bunda moliyaviy xizmatlar sohasi yetakchilik qilmoqda
Statistika agentligi tahlillariga ko‘ra, yanvar–iyun oylarida moliya sektori 26,3 foizlik o‘sish bilan xizmat ko‘rsatish sohalari orasida yaqqol yetakchiga aylandi. Shuningdek, me’morchilik va texnik sinovlar (24,6%), ta’lim (22,7%) hamda IT va aloqa xizmatlari (22,1%) ham eng tez rivojlanayotgan yo‘nalishlar safidan o‘rin oldi.
Mamlakatda ko‘chmas mulk bozori va tibbiyot sohasida ham barqaror dinamika saqlanib qolmoqda. Xususan, ko‘chmas mulk bilan bog‘liq xizmatlar 18,3 foizga, sog‘liqni saqlash sohasi esa 16,8 foizga kengaygan. Kundalik talab yuqori bo‘lgan savdo (14,9%), transport (14,7%) hamda shaxsiy xizmatlar (14,2%) ham umumiy iqtisodiy o‘sishga munosib hissa qo‘shdi.
Nisbatan pastroq, ammo barqaror o‘sish ko‘rsatkichlari umumiy ovqatlanish va joylashtirish (11,6%), maishiy texnikalarni ta’mirlash (11,4%) hamda ijara xizmatlari (7,4%) yo‘nalishida kuzatildi. Umumiy hisobda mamlakat bozor xizmatlari sektori yilning birinchi yarmida yuqori sur’atlarda rivojlanishda davom etmoqda.
