O‘zbekistonda 2030-yilgacha yalpi ichki mahsulot hajmi 300 milliard dollarga yetkaziladi — Shavkat Mirziyoyev
O‘zbekiston 2030-yilgacha yalpi ichki mahsulot hajmini 300 milliard dollarga yetkazishni maqsad qilmoqda. Bu haqda prezident Shavkat Mirziyoyev 28-avgust kuni O‘zbekiston mustaqilligining 35 yilligiga bag‘ishlangan tantanali marosimda ma’lum qildi.
“Iqtisodiy o‘sishning yuqori sur’atlarini saqlab qolgan holda, 2030-yilga borib yalpi ichki mahsulot hajmi 300 mlrd dollarga yetkaziladi”, — dedi Shavkat Mirziyoyev.
Buning uchun mamlakatda yettita milliy dastur amalga oshiriladi. Iqtisodiy yo‘nalishdagi dastur doirasida kelgusi 10 yilda 450 milliard dollar xorijiy investitsiya jalb etish rejalashtirilgan.
Shuningdek, sanoatda 2 millionta yuqori daromadli ish o‘rni yaratish, startaplar, venchur moliyalashtirish va sun’iy intellektni rivojlantirishga e’tiborni kuchaytirish ko‘zda tutilmoqda.
Prezident kichik biznesni o‘rta biznesga, o‘rta korxonalarni esa yirik kompaniya va korporatsiyalarga aylantirish uchun alohida ekotizim yaratilishini bildirdi.
“Buning hisobiga kelgusi o‘n yilda aholi jon boshiga YIM 10 ming dollardan oshadi”, — dedi davlat rahbari.Avvalroq 2030-yil uchun YIM bo‘yicha maqsad 240 milliard dollardan ortiq etib belgilangan edi. Dastlab “O‘zbekiston — 2030” strategiyasida 160 milliard dollarlik ko‘rsatkich belgilangan.
